35歲TVB索爆童星宣布離巢鼓起勇氣向外闖幸獲音樂人老公支持童星出身的35歲黃

35歲TVB索爆童星宣布離巢鼓起勇氣向外闖幸獲音樂人老公支持

童星出身的35歲黃美棋與音樂人兼主持鍾健威（Ray）去年結束11年愛情長跑，二人結婚只度過15個月，早前鍾健威爆出健康出現問題，令黃美棋非常擔憂。事隔逾一個月，黃美棋今日（21日）再放震撼彈，宣布離巢TVB。

黃美棋想當年拍第一套劇

黃美棋今日在IG撰長文宣布離巢消息：「等我放個震撼彈先，我要正式離開呢個陪我長大再返嚟追夢嘅地方lu。」黃美棋回想起首次拍劇的情況：「仲記得1994年，喺呢度拍咗我人生第一套劇集：《包青天》，以前嘅TVB係清水灣，大概喺我14歲嘅時候TVB先搬咗嚟將軍澳電視城。」

黃美棋曾自由身接工作

曾做自由身演員的黃美棋續道：「HKTV開唔到台之後，我做咗幾年自由身…但係因為好想拍劇、最後決定返去TVB…繼續呢個追夢之旅。」黃美棋坦言工作時有開心亦有失望：「喺呢度8年嘅日子當然有開心唔開心，有期待有等待有失望再期待，而我相信呢一種經歷基本上係每個藝人必經嘅階段…而我最大嘅收穫係做到幾個我好鍾意嘅節目，包括有（香港美食一條街，大玩特玩、玩轉粵北粵東懶人包、搶食著數特攻隊等等）。」

黃美棋感謝監製打好根基

黃美棋感謝欣賞她的監製及製作組：「能夠遇到一啲欣賞我嘅監製同製作組，發掘咗我一啲綜藝喜感嘅小宇宙，仲有連續四年做到直播版《歡樂滿東華》嘅網上版主持，每次6個鐘頭嘅直播…成為咗我做直播節目嘅根基。」黃美棋指《救妻同學會》是其最自豪的劇集：「雖然每星期播一集，形式太新穎…不過我依然好記得拍攝嘅點滴。」

黃美棋獲益良多感不捨

雖然心中不捨，但黃美棋認為已獲益良多：「呢一切都豐富咗黃美棋嘅人生！由一個大番薯，蛻變成為今日擁有有好多唔同節目、大show＋直播經驗嘅藝人。雖然心裏面都有萬般捨不得，但係聚散有時，每件事情都有終結嘅一刻，而我就選擇喺呢個時間離開呢個『避風港』，留低最美嘅回憶。」

黃美棋開心與薛家燕合作

黃美棋繼續多謝一眾幕後：「其實能夠喺離開前，同家燕姐有一個旅遊節目係天大嘅恩典，好感恩喺咁多年嚟每一位用過我嘅監製…導演…所有幕前幕後嘅工作人員，多謝你哋出現係我嘅生命中。仲有我所有喺公司嘅經理人，要多謝嘅人真係好多，請原諒我唔打晒出嚟。」更點名一人幫助她圓夢。

黃美棋珍惜所有機會

黃美棋不忘感謝老公：「仲有我老公，多謝你咁多年頂住我、撐住我，睇住我入TVB，再睇住我返出嚟，陪我度過每一個時刻！」黃美棋表示不會放棄演藝工作：「『外面風大雨大個市又唔好，留低好d喎，起碼有份糧！』係嘅…外面的確係風大雨大，（所以希望睇到呢個post 嘅PR朋友們都多多關照小妹，盡情搵我做嘢）但係我都好明白，如果宜家唔走，我驚我再無勇氣繼續去闖，要有向前嘅勇氣呀。同埋我嘅離開唔代表我放棄演藝嘅路，我更珍惜所有嘅機會，同埋有更多天大嘅空間去創作。最後多謝公司呢八年嚟俾我嘅所有機會，我拍咗條散水片㗎，過兩日有得睇。」