岑丽香宣布年底复出拍剧 唔胆心拍剧辛苦走样：唔觉得我会走样罗 岑丽香（香香）今日（27/8）现身尖沙咀出席护肤品活动，香香受访时表示：「其实我个人都几贪靓，但扮靓嘅时候，应该要有唔同嘅速度，就好似我要出门口嘅时候，我系有3样嘢要攞嘅，就系防晒、粉底及唇膏。如果有多余嘅时间，我可能会带晒成个化妆袋，然後慢慢化，化晒成个妆先出门都得。不过通常都系唔够时间，我都系上车先化。」 被问到有否因化妆太耐，而未能够准时出门口被老公投诉？香香笑言：「呢啲唔开心嘅嘢唔好提，呢啲嘢过咗就过咗，只要进步自己就得。讲真其实我一直都挑战紧控制化妆嘅时间，好似同自己斗快咁，目标就系唔好迟，又或者佢哋未得，而我就完成晒咁坐咗喺厅度等佢哋，咁样我就赢晒。（有冇赢过？）有赢过呀！佢哋见到我咁都O晒嘴，我仲同佢哋讲，唔紧要，慢慢，搞到自己好威咁，哈哈！」 此外，香香透露年底复出拍剧：「其实而家都仲倾紧，而自己都好期待，因为都用咗几年嘅时候，好用心机去凑小朋友，见佢哋都大咗少少，系时候都想做返自己锺意嘅嘢，老公都支持嘅，如果到时真系有好消息，就会同大家讲。（老公惊唔惊你拍剧捱坏？）其实佢都惊，佢之前系唔记得咗。（惊你拍剧辛苦到走样？）我唔觉得我会走样罗，哈哈。」#秋日生活打卡季#
